حوار مع نسختي/ نسختك الخايفة من الحسد

  

 

حوارات ذات (٢)

حوار مع نسختي/ نسختك الخايفة من الحسد

بصي بأه يا ندى

- خير

 

 

المرة دي ولا هينفع تقوليلي إنتي المسؤولة ولا إنعكاس ولا إنتي السبب ماشي؟

- أنا بغني في سري (عامل ليه فزلوكة..)...

خير يا ستو أنا؟

بصي بأه .... أنا كل ما أشوفها كل حاجة بتبوظ

كل ما أحكي لها على حاجة متتمش!

وده حسد والحسد مذكور في القرآن .. اعترضي بأه..

ها! اعترضي!

- إحم... طيب.. هو في الواقع...

البحر فيه قواقع

- انتي جاية تهرجي أنا عارفة..

خليني أقولك فين مسؤوليتك هنا...

الحسد مذكور في القرآن.. وكمان التحصين مذكور في القرآن...

يعني حضرتك مسؤولة عن تحصين نفسك!

طيب ندخل في الناحية الشعورية عشان ده تخصصي..

قبل ما تقولي كل ما أشوفها الحاجة اللي نفسي فيها بتبوظ.. سألتي نفسك إنتي حاسة إنك تستحقي الحاجة دي أصلا ولا لأ؟

آه طبعا أنا نفسي فيها جدا...

- طيب تعالي أقولك على مشكلتين في المعنى ده..

أولا.. نفسك فيها جداااا.. يعني حاسه إنها حاجة كبيرة جدااا.. أكبر منك... طبيعي تخافي تبوظ وتتسحد..

مش فاهمة..

- طيب قوليلي.. هل حاسة إنك ممكن تتحسدي على الكوباية اللي ماسكها دلوقتي وانتي بتتكلمي معايا؟

لأ طبعا.. دي كوباية يعني!

- عشان حاسة إنها حاجة عادية.. لكن الحاجة اللي نفسك فيها أويييي بالنسبة لك مش عادية إنها تحصل... فمش بتحصل!

ممممم مش عارفة مش مقتنعة أوي..

- تعالي طيب نبص على جانب تاني... حاولي كده تتخيلي الهدف ده بيحصل...

قوليلي حاسة بأي شعور مزعج؟

بصي اه.. ببقى خايفة أخسر حاجة قصاده... أو حاجة وحشة تحصل عموما..

- طب وايه رأيك في اللي بتقوليه؟

ايه؟

- يعني مينفعش يكون اللي بيحصل ده أصلا تنفيذ لمخاوفك الباطنية لإنك مش جاهزة للهدف ده ولا مطمنة إنه يحصل!

يعني ده أصلا في خدمتي؟

يعني ده انعكاس للخوف اللي جوايا؟

يعني برضه طلعت أنا اللي مسؤولة!

- أنا: ....

بصي هو لسه فيه كمان حتة كده...

ندااااااه كفاية استفزاز بأه

- أنا قصدي مصلحتك مش أكتر

طب قولي

- إنتي قلتي كل ما أحكي عن الحاجة مش بتكمل...

اه.. وعلى فكرة بأه ولا خايفة ولا حاسة إنها كبيرة عليا الحاجة دي تحديدا... ها سمعيني بأه هتقولي ايه!

- طيب.. حضرتك الحاجة عشان نعملها محتاجة طاقة صح؟

صح...

- ولما تفضلي تحكي عنها لكل الناس وهي لسه مكملتش.. حضرتك استثمرتي طاقتك في التنفيذ ولا وزعتيها في الكلام!

ايه ده تصدقي عمري ما فكرت فيها!

- لا ده كمان...

هو لسه فيه كمان!

- لما تتكلمي عن الهدف وتجيبي كل مشاعره وتعيشيها تماما ... ما حضرتك كده القيمة من وراء الهدف اتحققت خلاص... تحققيه ليه بأه!

....مم...

- ده غير إن ردود أفعال الناس ونصايحهم ومخاوفهم كل ده بيدخل في طاقة الهدف..

عشان كده بيقولوا داري على شمعتك تقيد؟ وإننا نستعين على الحاجة اللي عايزنها بالكتمان!؟

- عشان كده حضرتك قبل ما تتحججي بالأحداث اللي بره.. بصي بصة على مخاوفك ومقاومتك وقناعاتك...

ومسؤوليتك

- ومسؤوليتك

شكرا!

- عفوا!

____

لحجز جلسات تحرير المشاعر والصدمات التواصل على رسائل الصفحة

https://www.facebook.com/nada.abdelfattah.peat/

أو واتساب رقم 00201097766828

https://wa.me/message/FM4LDJASB43WD1

استعدي للإبحار في عالمك الداخلي

#ندى_عبد_الفتاح

#حوارات_ذات

#صحة_نفسية