حوار مع نسختي/ نسختك ال (مش طايقة حد)

 

حوارات ذات (٣)

حوار مع نسختي/ نسختك ال (مش طايقة حد):

زعلانة من الناس كلها..
مش عايزة اتكلم مع حد
مخاصمة الدنيا ... ومخاصمة نفسي كمان
حتى مكنتش عايزة أجي اتكلم معاكي

- حاسة بيكي ومقدرة مشاعرك...

فيا حاجة متغيرة يا ندى ... مش دي أنا!
بقيت عصبية أوي...
وأنا عارفة إن جوايا أجمل من كده بس قررت خلاص محدش يستاهل
خليني كده مطفية وخلاص

- طيب ممكن أسألك عن حاجة
قولي
- انتي حاسة بالغضب صح؟
جدا

- ممكن نتعمق شوية ونشوف ايه الطبقة اللي تحت الغضب..
غمضي عينك وحسي بالغضب.. خدي وقتك
وقويلي ظهر لك ايه؟

خيبة أمل ... خذلان

- طيب فتحي عينك..
بعيدا عن الناس والأحداث الخارجية
قوليلي هل إنت حاسة إنك زعلانة من نفسك؟
أوي..
حاسة إنك خذلتي نفسك بسبب إنك مقدرتيش تحققي هدف معين وده مخليكي حاسة بخيبة أمل؟

نعم!!!!
ندى انتي بتهزري؟؟
ده فعلا شعوري! أنا زعلانة من نفسي لإني نفسي أوصل لحاجة ومش عارفة وعلى طول بلوم نفسي وأتخانق معاها ومبقتش بحبها..

- يعني خناقتك مش مع الناس
مممم
- ومشاعر الخذلان هي أصلا مشاعرك انت لإنك في لحظة اتخانقتي مع فكرة الفشل ومستحملتيش غضبك من نفسك ده فأسقطيه على الناس

يا ندى معقولة! تاني.. طلعت أنا برضه المسؤولة وده انعكاس! مش ممكن بجد!

- طيب قوليلي أنهي أفضل... تكون المشكلة بره وده خارج نطاق إرادتك وسلطتك ولا تكون جواكي وانتي اللي بإديك تغيرها؟

طب أعمل ايه قوليلي؟
- أولا.. اعرفي إن في أي لحظة تحسي بالغيظ أو الغضب تجاه شخص قدامك انك منفصلة عن جزء جواكي من انسانيتك وكارهاه
وبعدين؟
- تواصلي مع الجزء ده... اقبلي وجوده جواكي كإنسان..
لو مثلا حسيتي بالفشل مش معناه إنك خلاص أصبحت هويتك فاشلة ... معناه إن جزء منك حاسس بالفشل .. مش أكتر من كده!
بعد ما تتصالحي عليه هتفهي رسائل كتير من وراه
نفذي الرسايل دي وانطلقي في حياتك..

أنا اصلا بدأت أحس إني أحسن دلوقتي!
- طيب قوليلي وانتي بدأتي تحسي أحسن... لسه مش طايقة حد وزعلانه من الناس كلها؟
ممم..
- جميل

_____

لحجز جلسات تحرير المشاعر والصدمات التواصل على رسائل الصفحة
https://www.facebook.com/nada.abdelfattah.peat/

أو واتساب رقم 00201097766828

https://wa.me/message/FM4LDJASB43WD1

استعدي للإبحار في عالمك الداخلي